Musibat Jis Se Zail Ho Rahi Saman Kar Dega

musibat jis se zaail ho rahi saman kar dega

na ghabrana khuda sab mushkilen asan kar dega

kharabat-e-jahan men kaun hai dil-soz saaqi sa

agar tarchhat bhi dena hai to tujh ko chhan kar dega

qanaat ki bhi daulat ho to istighna nahin lazim

jise tu nafa samjha hai yahi nuqsan kar dega

jagah dil men na de shauq-e-numu-dari buri shai hai

yahi chaska tujhe barbad ai nadan kar dega

kahunga aaj se main sahib-e-ejaz naseh ko

agar mere dil-e-muztar ka itminan kar dega

tamannaon ki mehmani tasavvur ke havale kar

ki jo saman munasib hai vahi saman kar dega

mata-e-be-baha se kam na jaan ai chashm ashkon ko

yahi rona tira khali tiri dukan kar dega

koi gar saltanat bhi de to vapas kar na le ai dil

subuk har tarf tujh ko ghair ka ehsan kar dega

kahe deta huun qatil le khabar jan-baz ki apne

fana shauq-e-shahadat men kisi din jaan kar dega

tiri ru-poshiyan ai husn kab be-kar jaengi

yahi parda ayaan aalam men teri shaan kar dega

yaqin kar le ki khud vo jalva-gar parde men hai varna

yahi zalim guman tera tujhe hairan kar dega

ghazal se kya murad ai ‘shad’ hai arbab-e-maani ki

kisi din tasfiya us ka mira divan kar dega

Leave a Comment