kishwar-naheed

Aakhiri Faisla

kanton ki chattan pe khadi

main ankhon ki suiyan nikal rahi huun

ye ilaqa kis saltanat men shamil hai

mulukiyat meri zaban pe kante

halq men phanda

ankhen bahar

shah-balut ke lambe darakhton jaise

lambe puut bahut ho gae hain

jangal men darakht ziyada ho jaaen

to aag laga kar darakht kam kar diye jaate hain

bahar nikli hui aankh se zaafran ka khet

aur kate hue bazuon se ganne ki poriyan ban gai hain

ham ne ek jhuut bola tha na

ab saari umr us ko sach sabit karne men guzar denge

ham ki jo zindagi bhar

apne hisse ki roti kamane ki koshish karte hain

aur bhuke rahte hain

jhuti aas ki chhatri tale

bulbule jaise aansu

batashon ki tarah thaal men sajae

kab tak batlati rahogi

ki vo tumhara qatil nahin hai

qatl mahz saniye men

zindagi ka rishta khatm karne ka naam nahin

maujud se inkar bhi

to qatl ke mutaradif hota hai

mera ji karta hai

vo jo sab mere qatil hain

main unhen hava ki tarah nigal jaun

More Poems

Leave a Comment