Gham-E-Hijran Se Zara Yun Bhi Nibhai Jae

Farogh Zaidi

gham-e-hijran se zara yuun bhi nibha.i jaa.e

mahfil-e-ghair sahi aaj saja.i jaa.e

iḳhtilafat ki buniyad hai gahri lekin

is pe nafrat ki na divar uTha.i jaa.e

pahle manzil ka ham apni to ta.ayyun kar len

phir zamane ko koi raah dikha.i jaa.e

mai ke baare men ḳhayalat badal ja.enge

hazrat-e-shaiḳh ko thoḌi si pila.i jaa.e

sab ke a.amal pe tanqid hai sheva jis ka

baat kirdar pe us ke bhi uTha.i jaa.e

yuun hi aqvam ki taqdir sanvarti hai ‘farogh’

ne.amat-e-ilm pe kuchh baat chala.i jaa.e