aankh se TuuT kar giri thi niind
vo jo mad.hosh ho chuki thi niind
meri ankhon ke kyuun jharoke tak
aa ke chup-chap si khaḌi thi niind
kis ne chheḌa hava ke lahje men
kaisi ḳhamosh si paḌi thi niind
niili ankhon ki kar raha tha main
jab tilavat to jal ga.i thi niind
kitni pur-lutf thiin miri raten
un dinon jab hari-bhari thi niind
chand mere sirhane baiTha tha
aur baghal men khaḌi hui thi niind
jab talak main kivaḌ karta band
‘sajid’ mujh duur ja chuki thi niind
Leave a Reply