Sajjad Baqar Rizvi
main ham-nafasan jism huun vo jaan ki tarah tha
main dard huun vo dard ke unvan ki tarah tha
jis ke liye ik umr kuen jhankte guzri
vo mah-e-karachi mah-e-kan.an ki tarah tha
tu kaun tha kya tha ki baras guzre par ab bhi
mahsus ye hota hai rag-e-jan ki tarah tha
jis ke liye kanTa sa chubha karta tha dil men
pahlu men vo aaya to gulistan ki tarah tha
ik umr ulajhta raha duniya ki hava se
kya main bhi tere kakul-e-pechan ki tarah tha
kuchh umr-e-gurezan se mire haath na aaya
har lamha tire gosha-e-daman ki tarah tha
Duube se kahan pyaas bujhi ahl-e-talab ki
main vadi-e-gul men bhi bayaban ki tarah tha
jiina to ghazab hai magar ai umr ajab hai
tujh ko to ḳhabar hai vo miri jaan ki tarah tha
ai raat ke andhiyare men jaage hue lamho
DhunDo use vo ḳhvab-e-pareshan ki tarah tha
miTTi ko yahan paanv pakaḌna nahin aata
main shahr men bhi gard ke tufan ki tarah tha
lo harf-e-ghazal ban ke numayan hua ‘baqar’
kal ramz sifat ma.ani-e-pinhan ki tarah tha
Leave a Reply