Poet
fikr kyuun hai qayam karne ki
koi manzil nahin Thaharne ki
daam tak le ga.i mujhe parvaz
dushmani mere bal-o-par ne ki
us sitamgar ke jaur-e-paiham se
kis ko fursat hai aah bharne ki
jaane kyuun hadse nahin hote
jab se Thani hai dil men marne ki
vo bhi ab ro rahe hain soch ke kuchh
thi ḳhushi jin ko mere marne ki
husn ki har ada ki zad pe rahe
kitni jur.at dil-o-jigar ne ki
dekh kar mujh ko ruḳh badal jaata
ek surat hai pyaar karne ki
kis tavaqqo pe ‘ashk’ ham jiite
gar na hoti umiid marne ki
Leave a Reply