Hawaon Se Har Sham Puchha Karenge

havāoñ se har shaam pūchhā kareñge

vo kab zaḳhm-e-dil kā mudāvā kareñge

milegā nayā ek ġham un ke dar se

ḳhushī kī agar ham tamannā kareñge

mujhe ḳhauf hai un kī mahfil meñ ik din

junūñ ke ye andāz rusvā kareñge

tirī yaad ke jhilmilāte diye hī

mire ġham-kade meñ ujālā kareñge

‘razā’ bā.is-e-dard-e-dil vo bane haiñ

samajhte the jin ko mudāvā kareñge

Leave a Comment