Nabeel Ahmad Nabeel
kahin jo azm zara hausla nikal aa.e
fasil-e-gham se naya rasta nikal aa.e
na puchh mujh se tu us husn-e-dilruba ki kashish
jidhar bhi dekhe vahan aa.ina nikal aa.e
kisi navah ki bhi baat ho magar ai dost
miyan-e-bazm tira tazkira nikal aa.e
main manta huun nahin tujh sa dusra koi
koi jo tere siva dusra nikal aa.e
sinan ki nok pe aa jaa.e gar mira sar bhi
falak se uncha mira martaba nikal aa.e
main us ḳhuda.i men zinda huun ik zamane se
har ik gali se naya ik ḳhuda nikal aa.e
‘nabil’ is liye main ashiqi se baaz aaya
jise bhi pyaar karun bevafa nikal aa.e
Leave a Reply