Poet
ḳhaam hai meri mohabbat varna ye aalam na ho
vo ḳhalish bhi kya ḳhalish hai dil men jo paiham na ho
raz-e-sar-basta na khul jaa.e hansi ke ba.ad bhi
un ki mahfil men koi fitrat-shanas-e-gham na ho
de sake ab tak na dastur-e-vafa tartib tum
kya ruke divar jab buniyad mustahkam na ho
jaate jaate bazm-e-ahl-e-gham pe ho ye bhi karam
aap is andaz se uThen ki ye barham na ho
kaun kho.e zarf apna varna ai pir-e-mughan
mere saghar men bhi mai zauq-e-talab se kam na ho
jab bhi aa.e zaḳhm-e-dil ko aur taaza kar ga.e
aise gham-ḳhvaron se behtar hai koi hamdam na ho
is guman ko bhi nazar-andaz kar sakte nahin
muntaha-e-irtiqa barbadi-e-alam na ho
Leave a Reply