mire subut bahe ja rahe hain paani men
kise gavah bana.un sara-e-fani men
jo an.suon men nahate rahe so paak rahe
namaz varna kise mil saki javani men
bhaḌak uThe hain phir a.ankhon men an.suon ke charagh
phir aaj aag laga di ga.i hai paani men
hamin the aaise kahan ke ki apne ghar jaate
baḌe-baḌon ne guzari hai be-makani men
ye be-kanar badan kaun paar kar paaya
bahe chale ga.e sab log is ravani men
visal o hijr ki ek ik charagh the donon
siyah ho ke rahe shab ke be-karani men
bas ek lams ki jal jaa.en sab ḳhas-o-ḳhashak
ise visal bhi kahte hain ḳhush-bayani men
kahani ḳhatm hui tab mujhe ḳhayal aaya
tire siva bhi to kirdar the kahani men
na chahiye mujhe vo asman jo mera na ho
main ḳhush huun apni hi miTTi ki asmani men
Leave a Reply