Charagh Hath Mein Ho to Hawa Musibat Hai

Anjum Saleemi

charagh haath men ho to hava musibat hai

so mujh mariz-e-ana ko shifa musibat hai

sahulaten to mujhe raas hi nahin atin

qubuliyat ki ghaḌi men dua musibat hai

uTha.e phirta raha main bahut mohabbat ko

phir ek din yunhi socha ye kya musibat hai

main aaj Duub chala ret ke samundar men

chahar-samt ye raqs-e-hava musibat hai

ḳhud-agahi ka jo mujh par nuzul jaari hua

main kya kahun ki ye rahmat hai ya musibat hai

bahut jacha hai ye be-dagh pairahan mujh par

go ḳhak-zad ko aisi qaba musibat hai

main kam hi rahta huun ‘anjum’ ḳhuda ki sohbat men

gunahgar ko ḳhauf-e-ḳhuda musibat hai