az-mehr ta-ba-zarra dil-o-dil hai aaina
tuuti ko shash-jihat se muqabil hai aaina
hairat hujum-e-lazzat-e-ghaltani-e-tapish
simab-e-balish o kamar-e-dil hai aaina
ghaflat ba-bal-e-jauhar-e-shamshir par-fishan
yaan pusht-e-chashm-e-shokhi-e-qatil hai aaina
hairat-nigah-e-barq-e-tamasha bahar-e-shokh
dar-parda-e-hava par-e-bismil hai aaina
yaan rah gae hain nakhun-e-tadbir tuut kar
jauhar-tilism-e-uqda-e-mushkil hai aaina
ham-zanu-e-taammul o ham-jalva-gah-e-gul
aina-band khalvat-o-mahfil hai aaina
dil kar-gah-e-fikr o ‘asad’ be-nava-e-dil
yaan sang-e-astana-e-‘bedil’ hai aaina
Leave a Reply