Humaira Rahat
barish ke qatre ke dukh se na-vaqif ho
tum hanste chehre ke dukh se na-vaqif ho
tum ne sirf bichhad jaane ka karb saha hai
pa kar kho dene ke dukh se na-vaqif ho
ek hi chhat ke niche rahte hain ham lekin
tum mere lahje ke dukh se na-vaqif ho
saath kisi ke rah kar jo tanha katta hai
tum aise lamhe ke dukh se na-vaqif ho
hathon ki chudi ki zaban samajh lete ho
phaile hue gajre ke dukh se na-vaqif ho
jo manzil tak ja ke aur kahin mud jaae
tum aise raste ke dukh se na-vaqif ho
Leave a Reply