zulf ko tha ḳhayal bose ka
ḳhat ne likkha saval bose ka
dohre patton ke zer-e-saya hua
sab qalam-band haal bose ka
chashmak-e-ḳhal-e-ruḳh ne saaf kaha
hai tabassum ma.aal bose ka
sabza-e-nau-damida ne maara
gird-e-ruḳhsar jaal bose ka
rah gaya tere mukhḌe par baaqi
ab makan ḳhaal ḳhaal bose ka
ho ghazab apne baal noch liye
hai ye saara vabal bose ka
tere ghusse se ab koi ‘insha’
chhoḌta hai ḳhayal bose ka
Leave a Reply