Ghayas Mateen
ḳhvab ankhon ki gali chhoḌ ke jaane nikle
ham idhar niind ki divar girane nikle
dhuul raste ka muqaddar hai to rasta kya hai
bas yahi baat zamane ko batane nikle
jab pahaḌon se mili daad hunar ki apne
dastan ham bhi samundar ko sunane nikle
rang se rang juda hone ka manzar dekha
tirgi aur shafaq sirf bahane nikle
jab samundar pe chale ham to ye sahra chup the
ab pahaḌi pe khaḌe hain to bulane nikle
asman jis ki zamin hai vo parinda huun main
jaane kyuun log yahan daam bichhane nikle
koi chehra na de avaz kisi lau se ‘matin’
shaam hote hi charaghon ko bujhane nikle
Leave a Reply