Mohabbat Raegani Hai Sambhal Ja

mohabbat rā.egānī hai sambhal jā

aziyyat kī kahānī hai sambhal jā

tujhe mīrās meñ hijrat milī hai

tabhī to lā-makānī hai sambhal jā

mohabbat jaan ko aa.ī huī hai

balā-e-nā-gahānī hai sambhal jā

ye barqī rābte se kaT na jaa.e

ye rishta āsmānī hai sambhal jā

ise dariyā samajh kar paar mat kar

mirī āñkhoñ kā paanī hai sambhal jā

ye āñkheñ surḳh ye pairoñ ke chhāle

kisī kī mehrbānī hai sambhal jā

vo mere gaañv ke raste meñ hogā

abhī bhī ḳhush-gumānī hai sambhal jā

Leave a Comment