raha pesh-e-nazar hasrat ka baab avval se aḳhir tak
paḌhi kis ne mohabbat ki kitab avval se aḳhir tak
ishara tak na likkha koi us ne rabt-e-baham ka
bahut be-rabt hai ḳhat ka javab avval se aḳhir tak
mayassar ḳhaak hota zindagi men lutf-e-tanha.i
rahe do do farishte ham-rikab avval se aḳhir tak
ḳhushi men bhi mohabbat dushman-e-sabr-o-sakun nikli
raha dil men vahi ik iztirab avval se aḳhir tak
ghalat-koshi ki aadat ne asar paida kiya aisa
ghalat nikla gunahon ka hisab avval se aḳhir tak
mujhe le aa.i hai umr-e-ravan kin ḳharzaron men
hua hai chaak daman-e-shabab avval se aḳhir tak
majal-e-guftugu paa.i to ab kyuun mohr-bar-lab hai
suna de o dil-e-ghaflat-ma.ab avval se aḳhir tak
andhere men talash-e-dil agar hoti to kya hoti
shab-e-tarik tha daur-e-shabab avval se aḳhir tak
dahan-e-zaḳhm se bhi ‘josh’ hal-e-dil suna dekha
namak-pashi hi tha un ka javab avval se aḳhir tak
Leave a Reply