ek pal ke liye the vo aa.e nazar
umr bhar dil pukara ki haa.e nazar
phuul ban kar hamesha hi khilti rahe
chand ban kar kabhi jagmaga.e nazar
vaqt-e-ruḳhsat tiri chashm-e-nam kya kahun
kaash manzar miri bhuul jaa.e nazar
jaane dil men ye kis ka ḳhayal aa gaya
aap hi aap ye muskura.e nazar
ik misali ghazal hai likhi aap par
ḳhvab lamhon se raushan bara.e nazar
ek muddat se hasrat yahi hai miri
mujh ko dekhe to phir vo mila.e nazar
us ke tir-e-nazar ki baḌi dhuum hai
aa.e dil pe mire azma.e nazar
us nazar ki nazar main utarungi phir
ik nazar jo tujhe dekh paa.e nazar
‘hadia’ ruuh men meri basta hai vo
kaise mumkin hai ab vo chura.e nazar
Leave a Reply