kisi ki chashm-e-gurezan men jal bujhe ham log
ajab mashaqqat-e-hijran men jal bujhe ham log
ham apne aks ko aina karne vaale the
pe ek lamha-e-hairan men jal bujhe ham log
sambhal paega phir kaun khvab ka varsa
isi khayal-e-pareshan men jal bujhe ham log
jo aankh se nahin tapke in ansuon ke saath
khud apne khema-e-mizhgan men jal bujhe ham log
hamare khuun ki qimat pe jo kharidi gai
usi bahar-e-gulistan men jal bujhe ham log
kahan talak ki uthate azab-e-tanhai
akele hujla-e-viran men jal bujhe ham log
saza-e-maut se bad-tar hai agahi ki saza
shuur-e-harf ke zindan men jal bujhe ham log
hamen kisi ka bahut intizar tha ‘ruhi’
so ban ke shama shabistan men jal bujhe ham log
Leave a Reply