bhejta huun har roz main jis ko ḳhvab koi an-dekha sa
us ki ankhen saari ḳhushbu us ka badan a.ina sa
us ne bas itna hi pucha sabz chinar ab kitne hain
sar se pa tak laraz uTha main dil pe gira ik sho.ala sa
chaTTanon ke siine par bhi khul kar jo muskata hai
sar-masti ka sar-chashma hai vo ik pauda nanha sa
logo lab kholo kuchh bolo jhelum hai maTiyala kyuun
main ne jab is ko dekha tha ye tha ik a.ina sa
barf shagufon ke mausam men kaash ik baar aa jaate tum
mere ḳhaton ki ḳhushbuon ka hota kuchh andaza sa
phir bhi ai ‘manzur’ kisi par haath na ab tak uTTha mera
laḌne ka fan siikh liya hai go main ne bhi thoḌa sa
Leave a Reply