Na Fasle Koi Nikle Na Qurbaten Niklin

na fasle koi nikle na qurbaten niklin

vafa ke naam se kya kya siyasaten niklin

khuli hai vahshat-e-alam pe aaj kakul-e-yar

kuchh aur daur-e-ḳhirad teri nisbaten niklin

hazar hathon ke paiman-e-nau ka markaz hai

hava ke haath men na-did taqaten niklin

sipah-e-ishq jahan ḳhandaqon men jalti thi

vo moḌ kaaT ke aḳhir mohabbaten niklin

faza-e-taza-nafas dilbari ki aa.i hai

na.i na.i gham-e-dil ki masafaten niklin

sharar-e-mahr-o-nam-e-abr ke taghayyur tak

visal-e-dost men kya kya nazakaten niklin

vahi ki rashk-e-raqiban se tira-tar hai jo zulf

kal ittifaq se us ki hikayaten niklin

vo harf-e-shak hai ki ahl-e-yaqin nahin samjhe

dimagh-e-kufr se kya kya haqiqaten niklin

kamand-e-sariq o mar-e-siyah men aḳhir

ye kis ka haath tha ye kis ki hikmaten niklin

visal-o-hijr se kya ishq se sambhal na sakin

tiri nigah men aisi nadamaten niklin

nigar-ḳhane ke naqsh-o-nigar kuchh bhi na the

junun ki aankh men ghaltida suraten niklin