kyuun ziist ka har ek fasana badal gaya
ye ham badal ga.e ki zamana badal gaya
sayyad yaan vahi vahi taa.ir vahi hain daam
lekin jo zer-e-dam tha daana badal gaya
bazi-e-husn-o-ishq men kuchh haar hai na jiit
nazren milin dilon ka ḳhazana badal gaya
baḳht-e-bashar vahi hai bisat-e-jahan vahi
har daur-e-nau men maat ka ḳhana badal gaya
taqat ke dosh par hai azal se bashar ki laash
bas thoḌi thoḌi duur pe shana badal gaya
mahfil ke hasb-e-zauq hai mutrib ka saaz bhi
mahfil badal ga.i to tarana badal gaya
in dagh-ha-e-dil men koi zaḳhm-e-nau nahin
shayad kisi nazar ka nishana badal gaya
‘mulla’ ko zor-e-tab.a hua faislon ki nazr
dariya abhi vahi hai dahana badal gaya
Leave a Reply