Use Malal Ho Kya Dost Ki Judai Ka

use malāl ho kyā dost kī judā.ī kā

jo sah chukā ho ġham-o-rañj āshnā.ī kā

bhalā.ī meñ bhī nikālā sabab burā.ī kā

banā diyā hai adū ne pahāḌ raa.ī kā

ye chāñd-tāre ye sūraj haiñ kyā darīche haiñ

tujhe bhī shauq hai goyā ki ḳhud-numā.ī kā

taḌaptā dekh ke charke lagā.e bismil ko

sitam to Thiik pa aalam tirī DhiTā.ī kā

maiñ jab yahāñ se gayā mere haath ḳhālī the

hisāb le liyā duniyā ne paa.ī paa.ī kā

Leave a Comment