Sair-E-Duniya Se Gharaz Thi Mahw-E-Duniya Kar Diya

Hari Chand Akhtar

sair-e-duniya se gharaz thi mahv-e-duniya kar diya

main ne kya chaha mire allah ne kya kar diya

rokne vaala na tha koi ḳhuda ko is liye

jo kuchh aaya us ke ji men be-muhaba kar diya

haan isi kam-baḳht dil ne kar diya ifsha-e-raz

haan isi kam-baḳht dil ne mujh ko rusva kar diya

ishq ja in teri baton men nahin aane ke ham

achchhe achchhon ko jahan men tu ne rusva kar diya

zindagi baiThi thi apne husn par bhuli hui

maut ne aate hi saara rang phika kar diya

husn ne pahle to sab mujh par haqiqat khol di

aur phir ḳhamosh rahne ka ishara kar diya

husn ko pahna chuke jab ḳhud-numa.i ka libas

ishq ne sar piiT kar puchha ki ye kya kar diya