Poet
masruf ham bhi anjuman-ara.iyon men the
ghar jal raha tha log tamasha.iyon men the
kitni jarahaten pas-e-ehsas-e-dard thiin
kitne hi zaḳhm ruuh ki gahra.iyon men the
kuchh ḳhvab the jo ek se manzar ka aks the!
kuchh shobade bhi us ki masiha.iyon men the
tapti zamin pe uḌte bagulon ka raqs tha
saat asman qahr ki purva.iyon men the
is tarah ḳhair o shar men kabhi ran paḌa na tha
kitne hi hadse miri paspa.iyon men the
ḳhilqat pe sadgi ka main ilzam kya dharun
jitne shigaf the miri dana.iyon men the
ashob-e-zat se nikal aaya tha ik jahan
ham qaid apni qafiya-paima.iyon men the
Leave a Reply