jabin-e-navaz kisi ki fusun-gari kyuun hai
sarisht-e-husn men is darja dilkashi kyuun hai
kisi ki saada jabin kyuun bani hai sehr-taraz
kisi ki baat men ejaz-e-isvi kyuun hai
kisi ki zulf-e-mo.ambar men kyuun hai gira.i
fida-e-gesu-e-mushken ye zindagi kyuun hai
tire shi.ar-e-taghaful pe zindagi qurban
tire shi.ar-e-taghaful men dilkashi kyuun hai
kahin ziya-e-tabassum na ho karam-farma
jumud-e-qalb men haijan-e-zindagi kyuun hai
ye kab kaha hai ki tum vaj.h-e-shorish-e-dil ho
ye puchhta huun ki dil men ye bekali kyuun hai
nigah-e-naz ki vabasta-e-jigar thi kabhi
bata fareb-e-tamanna ki sarsari kyuun hai
bhaTak bhaTak ke main nakam-e-justuju hi raha
ḳhamosh mere liye sham-e-rahbari kyuun hai
hayat-o-maut na apni na main hi ḳhud apna
mire vajud pe ilzam-e-zindagi kyuun hai
rag-e-hayat men dauḌa ke barq-e-sartabi
ḳhata-muaf ye ilzam-e-ḳhud-sari kyuun hai
bisat-e-dahr sahi jalva-gah-e-husn-e-azal
nigah-e-shauq fughan-sanj-e-tishnagi kyuun hai
Leave a Reply