Waqar Manvi
miri vafa mira isar chhin le mujh se
hai kaun jo mira kirdar chhin le mujh se
ye zindagi koi sau baar chhin le mujh se
magar nahin ki tira pyaar chhin le mujh se
ye vaqt vo hai ki qadmon men baiThne vaala
ye chahta hai ki dastar chhin le mujh se
ata ho ya to vahi dabdaba vahi jazba
nahin to ye miri lalkar chhin le mujh se
saval karti hai umr-e-ravan ki hai koi
jo meri tezi-e-raftar chhin le mujh se
main zer-e-saya-e-divar bhi huun ḳhauf-zada
ki vo na saya-e-divar chhin le mujh se
mira harif kam-auqat chahta hai ‘vaqar’
mira asasa-e-afkar chhin le mujh se
Leave a Reply