safar hi koi rahega na fasla koi
ye ik ḳhayal hai is par bhi tabsira koi
raqam hua huun yaqin o qayas donon men
kare to kaise kare mera tajziya koi
vo dast-e-sang hai main a.ina-girafta huun
na ho sakega kabhi ham men tasfiya koi
zamin pe aa.e na aa.e ye vahm hai sab ko
ḳhala ki god men palta hai hadsa koi
main ik lakir ka qaidi huun bavajud is ke
har ik lakir se milta hai silsila koi
na jaane kis liye rota huun hanste hanste main
basa hua hai nigahon men a.ina koi
hava sulati hai daman men zard patton ko
use bhi chahiye jiine ka mashghala koi
bhala hai duur rahe ik harif ki manind
hai phir bhi saa.e ka mujh se muamla koi
likha gaya nahin ‘manzur’ aaj tak shayad
shafaq ke baab men sub.hon ka tazkira koi
Leave a Reply