abdul-hamid-adam

Kashti Chala Raha Hai Magar Kis Ada Ke Sath

kashti chala raha hai magar kis ada ke saath

ham bhi na Duub jaaen kahin na-khuda ke saath

dil ki talab padi hai to aaya hai yaad ab

vo to chala gaya tha kisi dilruba ke saath

jab se chali hai aadam o yazdan ki dastan

har ba-vafa ka rabt hai ik bevafa ke saath

mehman mezban hi ko bahka ke le uda

khushbu-e-gul bhi ghuum rahi hai saba ke saath

pir-e-mughan se ham ko koi bair to nahin

thoda sa ikhtilaf hai mard-e-khuda ke saath

shaikh aur bahisht kitne taajjub ki baat hai

ya-rab ye zulm khuld ki ab-o-hava ke saath

padhta namaz main bhi huun par ittifaq se

uthta huun nisf raat ko dil ki sada ke saath

mahshar ka khair kuchh bhi natija ho ai ‘adam’

kuchh guftugu to khul ke karenge khuda ke saath

More Poems

Leave a Comment