agarche mujh ko judai tiri gavara nahin
sivae is ke magar aur koi chara nahin
khushi se kaun bhulata hai apne pyaron ko
qusur is men zamane ka hai tumhara nahin
tumhare zikr se yaad aae kya ghata ke siva
hamare paas koi aur istiara nahin
ye iltifat ki bhiik apne paas rahne de
tire faqir ne daman kabhi pasara nahin
mira to sirf bhanvar tak safina pahuncha hai
tujhe to dubne valon ne bhi pukara nahin
har ek rabt tire vaste se tha varna
bhare jahan men koi ashna hamara nahin
jo teri diid ne bakhshe vahi hain zakhm bahut
ab apne dil men koi hasrat-e-nazara nahin
bana sakun jise jhumar tumhare mathe ka
falak pe aaj bhi aisa koi sitara nahin
chalae jaao ‘qatil’ apna karobar-e-vafa
jo is men jaan bhi jaae to kuchh khasara nahin