Meer Mehdi Majrooh
sar ko tan se mire juda kiije
ye bhi jhagda hai faisla kiije
mujh pe tohmat sanam-parasti ki
shaikh sahab khuda khuda kiije
laal ko us ke lab se kya nisbat
ye bhi ik baat hai suna kiije
lo vo aate hain jald hazrat-e-dil
fikr-e-sabr-e-gurez-pa kiije
ham ghanimat usi ko samjhenge
lo vafa vada-e-jafa kiije
apna kiina banun ki yad-e-raqib
kis tarah us ke dil men ja kiije
yaan to matlab hi kuchh nahin rakhte
jo kisi se kahen rava kiije
muddai ghaat hi men rahte hain
kyuun ki vaan arz-e-muddaa kiije
dukh jo ‘majruh’ ne sahe gham se
us ka kya sharh-e-majra kiije
mar gaya vo pa yaad aata hai
us ka kahna ki aah kya kiije
sakht mushkil hai yaar ka khulna
ye girah kis tarah se va kiije
sabr ke faede bahut hain vale
dil hi bas men na ho to kya kiije
ghair ki pasban ki darban ki
kis ki ja ja ke iltija kiije
us ki vo aankh ab nahin ‘majruh’
jald kuchh apna sujhta kiije
Leave a Reply