na jaane kaisi mahrumi pas-e-raftar chalti hai
hamesha mere aage aage ik divar chalti hai
vo ik hairat ki main jis ka ta.aqub roz karta huun
vo ik vahshat mire hamrah jo har baar chalti hai
nikal kar mujh se bahar lauT aati hai miri janib
miri divangi ab surat-e-parkar chalti hai
ajab andaz-e-ham-safari hai ye bhi qafile vaalo
hamare darmiyan ik ahani divar chalti hai
ghazal kahna bhi ab ik kar-e-be-masraf sa lagta hai
naya kuchh bhi nahin hota bas ik takrar chalti hai
‘nabil’ is ishq men tum jiit bhi jaao to kya hoga
ye aisi jiit hai pahlu men jis ke haar chalti hai
Leave a Reply