Poet
chhoTe baḌe bure bhale din raat ke liye
har shai hai sirf surat-e-halat ke liye
maujud hain is a.ina-ḳhana men har taraf
mere hi aks meri mulaqat ke liye
jo baat sochne ki hai kab sochta huun men
kab sochta hai koi meri zaat ke liye
phirti hain dil men suraten qurb-o-javar ki
abad hai ye shahr mazafat ke liye
chhoTe se peḌ ki jaḌen jaati hain duur duur
sahra men rizq DhunDne har paat ke liye
main ruk gaya chaḌhi hui naddi ke samne
kuchh vaqt mere paas tha barsat ke liye
ham log hain saleT pe likkhe hue ‘nasim’
miTna paḌega agle savalat ke liye
Leave a Reply