Mohammad Ismail Aasi Aarwi
hazar zaḳhm hain dil par jigar pe khaa.e hue
magar mile jo kisi se to muskura.e hue
kuchh is ada se vo aa.e nazar jhuka.e hue
tamam rah ga.e shikve zaban pe aa.e hue
udhar to saghar-o-paimana vaale rahte hain
udhar kahan chale vaa.iz qadam baḌha.e hue
baḌho kuchh aur ki tariki-e-jafa kam ho
isi tarah se charagh-e-vafa jala.e hue
hamen satane se baaz aaoge yaqin to nahin
tumhare kitne hi va.ade hain azma.e hue
tumhare tir-e-nazar ko kisi ne kuchh na kaha
hamari aah ko hain dastan bana.e hue
hamara zikr aur is mai-kade men ai ‘asi’
yahan to shaiḳh-o-barahman hain Dagmaga.e hue
Leave a Reply