Palkon Tak Aa Ke Ashk Ka Sailab Rah Gaya

Anjum Khaleeq

palkon tak aa ke ashk ka sailab rah gaya

dariya darun-e-halqa-e-girdab rah gaya

ye kaun hai ki jis ko ubhare hue hai mauj

vo shaḳhs kaun tha jo tah-e-ab rah gaya

naḳhl-e-ana men zor-e-numu kis ghazab ka tha

ye peḌ to ḳhizan men bhi shadab rah gaya

kya shahr par khuli hi nahin ayat-e-ḳhulus

kya ek main hi vaqif-e-adab rah gaya

kuchh zikr-e-yar jis men tha kuchh zikr-e-vasl-e-yar

tadvin-e-zindagi men vahi baab rah gaya

jo shai yahan ki thi vo yahin chhoḌ di magar

ankhon ke biich ek tira ḳhvab rah gaya

dekha jo phir se janib-e-dariya ravan mujhe

bal kha ke apne aap men girdab rah gaya

‘anjum’ tiri zamin abhi kitni duur hai

koson-pare to qariya-e-mahtab rah gaya