Akhtar Ul Iman
kuchh aaise hain jo zindagi ko mah-o-sal se napte hain
gosht se saag se daal se napte hain
khat-o-khal se gesuon ki mahak chaal se napte hain
saubat se janjal se napte hain
ya apne aamal se napte hain
magar ham ise azm-e-pamal se napte hain
ye lamha jo guzra mire khuun ki us men surkhi mili hai?
mire ansuon ka namak is ki lazzat men shamil hua hai?
pasine se girdab-e-sahil hua hai?
ye la ka safar la rahega ki kuchh is ka hasil hua hai
ki jaise thi barson se vaisi hi tishna-dili hai?
men kab se zamin par zamin ki tarah chal raha huun
ye divana andha safar kab kahan ja ke chhodega mujh ko?
main is zindagi ki bahut si baharen ghiza ki tarah kha chuka huun
pahan odh kar pairahan ki tarah phaad di hain
men resham ka kiida huun koe men chhap jaata huun dar ke maare
isi koe ko khata rahta huun aur kaat kar is se aata huun bahar
aur apne jiine ka maqsad sabab janna chahta huun
mira dil khuda ki raza dhundhta phir raha hai
mira jism lazzat ki justuju men laga hai
guzargah-e-sham-o-sahar par kahin ek din main uga tha
nabatat ki tarah jiita huun is kargah-e-jahan men
na ehsas iman iqan koi
na duniya men shamil na khud apni pahchan koi
gunah aur jahannam savab aur jannat?
ye kyuun hai ki be-muzad kuchh bhi nahin mil saka hai
na kal mil sakega
asatir farman-ravaon ke ahkam aur sufiya ki karamat ke qisse
payambar ki dil-soziyon ke mazahir
qalam-band hain sab!
unhen ham ne taaviz ki tarah apne galon men hamail kiya hai
inhen ham ne tah-khanon ki kothari men muqaffal kiya hai
jahan ladkhadate hain in ki madad le ke chalte hain aage
magar raston ka taayyun nahin hai!
main bikhra hua aadmi huun
miri zehni bimariyon ka sabab ye zamin hai
main us din se darta huun jab barf saari pighal kar
ise gharq kar de
nae asmani havadis
sifar men badal den
ya aadmi apne aamal se khud
ise ik kahani bana de
zamin shora pushton ki amaj-gah ban gai hai
khuda ek hai yuun to vavian men saaf likkha hua hai
magar zer-e-vavain bhi chhoti chhoti bahut takhtiyan hain
jali harf jin ke bahut ummaton ka pata de rahe hain
jo ye takhtiyan apni gardan men latkae
zunnar pahne hue koi tasbih thame
apni gard-e-safar ke dhund men lipte chale ja rahe hain
zaitun ki shakh tulsi ke patte
hava men ude ja rahe hain
chiyuntiyon ki qataren qaran-dar-qaran
mukhtalif pech-dar-pech rahon se guzri chali ja rahi hain
saikadon sar kate dhad bahut raston par pade hain
havan ho rahe hain
yag ke mantron ki sada
aag men jalne vaali samagri ki bahut tez bu
har taraf phail kar bas gai hai hava men
aur vavain ki qaid men jo khuda hai
la-makan se
jo hota hai hota rahega
baitha chup-chap sab dekhta hai
ham bhi kyuun na khuda ki tarah yunhi chup saadh len
ped paudon ki manind jiite rahen
zabh hote rahen!
vo duaen jo barud ki bu men bas kar
bhatakti hui zer-e-arsh-e-barin phir rahi hain
unhen bhuul jaaen
zindagi ko khuda ki ata jaan kar zehn mauf kar len
yava-goi men ya zehni hizyan men khud ko masruf kar len
un men mil jaaen jo zindagi ko
gosht se saag se daal se napte hain
mah-o-sal se napte hain
apna hi khuun piine lage hain
chak-damaniyan gham se siine lage hain
Leave a Reply