Riyasat Ali Taj
chandni chhiTki hui ho to ghazal hoti hai
jal-pari paas khaḌi ho to ghazal hoti hai
dil-nashin koi nazara koi dilkash manzar
baat dilchasp koi ho to ghazal hoti hai
ya kisi dard men Duubi hui avaz-e-nahif
ya koi chiḳh suni ho to ghazal hoti hai
sha.iri naam hai ehsas ke lau paane ka
aag si dil men dabi ho to ghazal hoti hai
koi khilta hua chehra koi ghuncha koi phuul
aankh sairab hui ho to ghazal hoti hai
darmiyan aap ke mere koi haa.il ho jaa.e
koi divar khaḌi ho to ghazal hoti hai
koi jiddat koi nudrat koi pakiza ḳhayal
haan koi baat na.i ho to ghazal hoti hai
pahle sha.ir ko mile zehn-e-rasa qalb-gudaz
phir vo lafzon ka dhani ho to ghazal hoti hai
aam halat men hoti nahin ai ‘taj’ ghazal
kuchh na kuchh dard-sari ho to ghazal hoti hai
Leave a Reply