zahida-zaidi

Bu-E-Gul Raqs Mein Hai Baad-E-Khizan Raqs Mein Hai

bu-e-gul raqs men hai bad-e-khizan raqs men hai

ye zamin raqs men hai saara jahan raqs men hai

ruuh sarshar hai aur chashm-e-takhayyul bedar

baad muddat ke vahi shola-e-jan raqs men hai

jal uthe zehn ke aivan men lafzon ke charagh

aaj phir garmi-e-andaz-e-bayan raqs men hai

phir kisi yaad ki kashti men ravan hain lamhat

ju-e-dil raqs men hai vadi-e-jan raqs men hai

kitna jan-bakhsh hai ye ishq ki vaadi ka safar

naghma-zan taifa-e-lazzat-e-jan raqs men hai

band ankhon men larazta hai koi manzar-e-nur

jaise tabinda sitaron ka jahan raqs men hai

mahzar-e-shauq men paikar-e-guman se aage

zehn hai naghma-sara jazb-e-nihan raqs men hai

khvab to khvab hain pal bhar men bikhar jaate hain

sach to ye hai ki bas ik kahish-e-jan raqs men hai

biich sagar men to the hausle maujon se buland

aur sahil pe ik ehsas-e-ziyan raqs men hai

More Poems

Leave a Comment