Chaman Hai Maqtal-E-Naghma Ab Aur Kya Kahiye

Majrooh Sultanpuri

chaman hai maqtal-e-naghma ab aur kya kahiye

bas ik sukut ka aalam jise nava kahiye

asir-e-band-e-zamana huun sahaban-e-chaman

miri taraf se gulon ko bahut dua kahiye

yahi hai ji men ki vo rafta-e-taghaful o naaz

kahin mile to vahi qissa-e-vafa kahiye

use bhi kyuun na phir apne dil-e-zabun ki tarah

kharab-e-kakul o avara-e-ada kahiye

ye ku-e-yar ye zindan ye farsh-e-mai-khana

inhen ham ahl-e-tamanna ke naqsh-e-pa kahiye

vo ek baat hai kahiye tulu-e-subh-e-nashat

ki tabish-e-badan o shola-e-hina kahiye

vo ek harf hai kahiye use hikayat-e-zulf

ki shikva-e-rasan o bandish-e-bala kahiye

rahe na aankh to kyuun dekhiye sitam ki taraf

kate zaban to kyuun harf-e-na-rava kahiye

pukariye kaf-e-qatil ko ab mualij-e-dil

badhe jo nakhun-e-khanjar girah-kusha kahiye

pade jo sang to kahiye use nivala-e-zar

lage jo zakhm badan par use qaba kahiye

fasana jabr ka yaron ki tarah kyuun ‘majruh’

maza to jab hai ki jo kahiye barmala kahiye