Iqbal Ashhar
pyaas dariya ki nigahon se chhupa rakkhi hai
ek badal se baḌi aas laga rakkhi hai
teri ankhon ki kashish kaise tujhe samjha.un
in charaghon ne miri niind uḌa rakkhi hai
kyuun na aa jaa.e mahakne ka hunar lafzon ko
teri chiTThi jo kitabon men chhupa rakkhi hai
teri baton ko chhupana nahin aata mujh se
tu ne ḳhushbu mire lahje men basa rakkhi hai
ḳhud ko tanha na samajh lena na.e divanon
ḳhaak sahraon ki ham ne bhi uḌa rakkhi hai
Leave a Reply