KHud Se Guzre to Qayamat Se Guzar Jaenge Hum

ḳhud se guzre to qayāmat se guzar jā.eñge ham

ya.anī har haal kī hālat se guzar jā.eñge ham

ālam-e-vus.at-e-imkāñ nazar aa.egā hameñ

ya.anī har duurī o qurbat se guzar jā.eñge ham

ḳhatm ho jā.egī sab kashmakash-e-harf-o-adad

ya.anī har manfī o musbat se guzar jā.eñge ham

na makāñ hogā vajūd aur na zamāñ hogā adam

ya.anī har tañgī o vus.at se guzar jā.eñge ham

ālam-e-hū dil-e-bīnā ko nazar aa.egā

hasrat o vahshat o hairat se guzar jā.eñge ham

Leave a Comment