Hadd-E-Fasil to Faqat Dard Ka Sahra Nikli

Quaiser Khalid

hadd-e-fasil to faqat dard ka sahra nikli

chashm-e-afsurdagi-e-ḳhushk hi dariya nikli

su-ba-su bhaTke nigahon men liye us ki si

ek surat bhi kisi dar na daricha nikli

ham ki mauhum si hasrat bhi liye phirte hain

kitne hain jin ki har ik ḳhvahish-e-beja nikli

ik zara Thes lagi TuuT ga.i himmat-e-jan

ahani jis ko samajhte the vo shisha nikli

chiir kar parda-e-zulmat ko nida-e-ghaibi

raushni banTne duniya ko hamesha nikli

roz-o-shab ik na.i ummid na.i si uljhan

azma.ish jise samjhe the natija nikli

na-muradi ka hai kohra sa dil-o-zehn pe vo

koi ḳhvahish si to nikli hai magar kya nikli

umr bhar saath rahe yaad tiri dukh ho ki sukh

kya samajhte the ise ham ye magar kya nikli

qarya-e-zar men mila ye bhi nazara har su

dhuup rangon ki liye duḳhtar-e-havva nikli

Dar chaTakne ki ḳhushi par hi bikharne ka hua

bu-e-gul phuuT ke jab ghuncha-ba-ghuncha nikli

ḳhvab yuun bhi kabhi tabir men apne na Dhale

zindagi apni kisi ziist ka hissa nikli

kya sabab hai ki tula hai tu miTane pe hamen

asman ek bhi kiya apni tamanna nikli

vaqt ka koh-e-giran kaaT ke farhad banun

kamrani isi raste se hamesha nikli