hijr lazim hai to ye hijr nibha.e jaao
ja rahe ho to koi rabt bana.e jaao
jo bhi is dil pe guzarti hai raqam karte raho
kaise mumkin hai kitabo se bhula.e jaao
shayad ye tarz kisi ruuh men ghar kar jaa.e
ain mumkin hai kisi dil men basa.e jaao
ye miri raat bhi ummid laga.e hue hai
us ke daman se koi sub.h laga.e jaao
guftugu karte agar saath men hote kuchh der
jaate jaate mujhe ik sher suna.e jaao
meri taḳhliq ko avaz bana do ‘maham’
meri tahrir ki ḳhamoshi miTa.e jaao
Leave a Reply