dara ke mauj o talatum se ham-nashinon ko
yahi to hain jo duboya kiye safinon ko
sharab ho hi gai hai ba-qadr-e-paimana
ba-azm-e-tark nichoda jab astinon ko
jamal-e-subh diya ru-e-nau-bahar diya
miri nigah bhi deta khuda hasinon ko
hamari raah men aae hazar mai-khane
bhula sake na magar hosh ke qarinon ko
kabhi nazar bhi uthai na su-e-bada-e-nab
kabhi chadha gae pighla ke abginon ko
yahi jahan hai jahannam yahi jahan firdaus
batao alam-e-bala ke sair-binon ko
hue hain qafile zulmat ki vadiyon men ravan
charagh-e-rah kiye khun-chakan jabinon ko
tujhe na maane koi tujh ko is se kya ‘majruh’
chal apni raah bhatakne de nukta-chinon ko
Leave a Reply