duur tak dasht men ujala hai
jaane kis qahr ka havala hai
phir ugalne lagi hai aag zamin
phir koi qatl hone vaala hai
shahr-e-ḳhush-baḳht ka makin huun magar
gird mere ghamon ka haala hai
dil ne gham ka alaav lafzon men
kis maharat se aaj Dhala hai
jurm sarzad hua tha aadam se
mujh ko jannat se kyuun nikala hai
teri ik aarzu ne logon ko
kis qadar uljhanon men Daala hai
ik saza-yafta-e-ishq ne aaj
mansab-e-ishq phir sambhala hai
phir ‘ḳhayal’-e-sitam-zada men koi
ḳhushbu-angez misl-e-lala hai
Leave a Reply