jab se qarib ho ke chale zindagi se ham
khud apne aaine ko lage ajnabi se ham
kuchh duur chal ke raste sab ek se lage
milne gae kisi se mil aae kisi se ham
achchhe bure ke farq ne basti ujaad di
majbur ho ke milne lage har kisi se ham
shaista mahfilon ki fazaon men zahr tha
zinda bache hain zehn ki avargi se ham
achchhi bhali thi duniya guzare ke vaste
uljhe hue hain apni hi khud-agahi se ham
jangal men duur tak koi dushman na koi dost
manus ho chale hain magar bambai se ham
Leave a Reply