hai kaThin raah to gir gir ke sambhalna hoga
apne manzil ki taraf dauḌ ke chalna hoga
apne ḳhvabon ko haqiqat men badalne ke liye
ḳhvab-e-ghaflat se kisi taur nikalna hoga
tez andhi men jalana hai agar apna charagh
ruḳh havaon ka ba-har-hal badalna hoga
ban ke ulfat ki ghaTa tum yahan barson varna
aag nafrat ki jo bhaḌkegi to jalna hoga
chup rahoge to na mil pa.ega insaf kabhi
us ko paane ke liye tum ko machalna hoga
zindagi maang rahi hai jo umango ki dalil
tum ko dariya ki tarah phir se ubalna hoga
tum jo chahe ki ujala ho tire dam se ‘munib’
ban ke ik sham.a yahan tujh ko pighalna hoga
Leave a Reply