ham ajal ke aane par bhi tira intizar karte
koi va.ada sach jo hota to kuchh e.atibar karte
jo na sabr aur dam-bhar tire be-qarar karte
abhi barq ka tariqa falak iḳhtiyar karte
agar itni baat sunte ki hai ishq men musibat
kabhi ham na teri ḳhatir dil-e-be-qarar karte
dil-e-zar be-ḳhabar tha kiya qatl to maza kya
ye sipah-gari hai pahle ise hoshiyar karte
yahi chahte hain ai jaan miTe gham ki jaan jaa.e
abhi maut agar na aati tira intizar karte
gham-o-dard-o-ranj sah ke tujhe dete ham dil apna
inhin bevafa.iyon par tira e.atibar karte
jo safar ka vaqt aaya na pukare saath vaale
abhi aankh lag ga.i thi hamen hoshiyar karte
jo ḳhilaf umiid ke ho to shikasta-ḳhatiri hai
ka.i TukḌe dil ke hote jo tum ek vaar karte
vo na aa.e mar ga.e ham agar aate bhi to kya tha
yahi jaan sadqe karte yahi dil nisar karte
hamen jaan de ke maara hamen de ke dil miTaya
na gham-e-firaq hota na ḳhayal-e-yar karte
vo ada thi qatl-gah men ki bayan se hai bahar
mire dil pe zaḳhm paḌta vo kisi pe vaar karte
tiri samt ki tavajjoh na kabhi jahan-e-fani
jo zara sabat paate to kuchh e.atibar karte
ḳhabar us ki pahle hoti ki na aa.ega ye ham ko
to ‘rashid’ sher ka fan na ham iḳhtiyar karte
Leave a Reply