Bala Hi Ishq Lekin Har Bashar Qabil Nahin Hota

Saqib Lakhnavi

bala hi ishq lekin har bashar qabil nahin hota

bahut pahlu hain aise bhi ki jin men dil nahin hota

nishan-e-be-nishani miT nahin sakta qayamat tak

ye naqsh-e-haq jafa-e-dahr se batil nahin hota

jahan men na-umidi ke siva ummid kya ma.ani

sabhi kahte hain lekin dil mira qaa.il nahin hota

taḌapna kis ka dekhoge jo zinda hon to sab kuchh ho

bala-e-ishq ka maara kabhi bismil nahin hota

sada.en de raha huun muddaton se ahl-e-marqad ko

sabhi sote hain lekin yuun koi ghafil nahin hota

sarishk-e-gham ki had sham-o-sahar men mil nahin sakti

umanDte hain jo ye dariya to phir sahil nahin hota

dua de ishq ko ai zulm tu bhi zeb-e-pahlu hai

vagarna kaisa hi paikan ho lekin dil nahin hota

faramoshi hai lekin yaad rakhta hai tire dar ko

dar-e-aghyar par ‘saqib’ kabhi saa.il nahin hota