Dattatriya Kaifi
paani siyane dete hain kya phunk phunk kar
dil soz-e-gham ne ḳhaak kiya phunk phunk kar
chhiḌkav ab-e-tegh ka hai ku-e-yar men
paanv is zamin pe rakhiye zara phunk phunk kar
dekha na ankh-bhar ke nazar ke ḳhayal se
lete hain ham to naam tira phunk phunk kar
hoga na saaf jhuTi hava-ḳhvahiyon se dil
yuun dil ka kab ghubar uḌa phunk phunk kar
bad-e-nafas se dagh-e-dil-e-sard jal uThe
ham ne jila diya hai diya phunk phunk kar
ulTa hai kya is ah-e-sharar-bar ka asar
dil hi bujha diya hai mira phunk phunk kar
piiri men aa.egi na kabhi taqat-e-shabab
ai piir laakh paare ko kha phunk phunk kar
shaitan ka dhoka zahid-e-pur-fan pe kyuun na ho
piita hai chhachh dudh-jala phunk phunk kar
atish-bayani-e-lab-e-‘kaifi’ ne bazm men
dushman ke dil ko ḳhaak kiya phunk phunk kar
Leave a Reply